Kryetari i Komunës së Rahovecit, Smajl Latifi, ka njoftuar për rritjen e subvencionimit për çdo lindje nga 500 në 600 euro.
Përmes një postimi në Facebook, Latifi ka bërë të ditur se kjo mbështetje financiare pritet të rritet sërish, duke arritur në 750 euro deri në fund të mandatit të tij.
Ai ka njoftuar se sot ka nënshkruar vendimet e para për subvencionimin e dy lindjeve të realizuara në Qendrën Kryesore të Mjekësisë Familjare (QKMF) “Dr. Fahredin Hoti” në Rahovec.
Sipas Latifit, nga muaji janar i këtij viti, çdo lindje e kryer në repartin e maternitetit të kësaj qendre do të mbështetet nga Komuna e Rahovecit me 600 euro, nga 500 euro sa ishte më parë, ndërsa rritja në 750 euro do të realizohet në përputhje me zotimin e dhënë gjatë mandatit të tij.
“Nga janari i këtij viti, çdo lindje e realizuar në repartin e maternitetit të QKMF-së “Dr. Fahredin Hoti”, do të mbështetet nga Komuna e Rahovecit me 600€, nga 500€ sa ishte më parë, ndërsa deri në fund të mandatit, në përputhje me zotimin e dhënë, subvencionimi do të rritet në 750€”, ka shkruar Latifi. /teve1.info/
