Kryetari i Kamenicës dhe kandidati i LVV-së për një mandat të ri, Kadri Rahimaj, ka deklaruar se komuna që ai udhëheq po bëhet me dy çerdhe të reja, pas dy dekadash ku nuk ishte ndërtuar asnjë institucion i tillë.
Ai tha se njëra nga çerdhet tashmë ka përfunduar në Koretin, me kosto prej 741 mijë eurosh dhe kapacitet për 220 fëmijë, ndërsa tjetra po ndërtohet me intensitet në Roganë.
Rahimaj theksoi se këto projekte janë realizuar në fund të mandatit, por sipas tij, kanë munguar planifikimet e mëhershme.
“Në vitin 1982 është bërë ndërtimi i parë i çerdhes publike në Kamenicë. Asnjë çerdhe për 20 vite, asnjë. Ne po ndërtojmë dy çerdhe. Njëra nga çerdhet ka përfunduar në fshatin më të madh në Kamenicë. Ndërsa, çerdhja në Roganë po ndërtohet në intensitet shumë të lartë. Po e bëjmë Kamenicën edhe me dy çerdhe të reja, e vërtetë kah fundi i mandatit, por një përfundoi në Koretin, ndërtimi i së cilës ka kushtuar 741 mijë euro. E para, s’ka kompani që e ndërton brenda një viti këtë çerdhe. E dyta, është e parashikuar për 220 fëmijë për shkak që çerdhja do të jetë regjionale. E rëndësishme është që është dashur me hartua projekt. Asnjë projekt nuk ka qenë i gatshëm për çerdhe në Kamenicë. Pra, as në vizionin e tyre të shkurt nuk ka pasur synime që me pasë çerdhe në Kamenicë”, deklaroi ai në emisionin “Këndi i Debatit” në Tëvë1.
