Një 33-vjeçar ka humbur jetën pas një aksidenti të ndodhur të enjten mbrëma në fshatin Leshan të Komunës së Suharekës, pasi ra nga një pemë qershie nga një lartësi prej rreth 5 deri në 6 metrash.
Lajmin e ka konfirmuar për media zëdhënësi i Policisë së Kosovës për rajonin e Prizrenit, Shaqir Bytyqi.
Sipas policisë, viktima me inicialet F.B. fillimisht është transportuar me autoambulancë në Spitalin Rajonal të Prizrenit, ndërsa më pas është dërguar për trajtim në QKUK në Prishtinë, ku edhe është konstatuar vdekja e tij.
“Më datën 11.06.2026, rreth orës 20:30, Policia është njoftuar nga Emergjenca e Suharekës se F.B., mashkull rreth 33 vjeç, është marrë me autoambulancë nga shtëpia e tij në fshatin Leshan, Komuna e Suharekës, pas një rënieje nga një pemë qershie nga lartësia rreth 5-6 metra”, ka deklaruar Bytyqi.
Ai ka bërë të ditur se viktima është dërguar fillimisht në Prizren e më pas në Prishtinë për trajtim mjekësor.
“I njëjti fillimisht është dërguar në Spitalin Rajonal të Prizrenit, më pas në QKUK – Prishtinë, ku rreth orës 21:15 është konstatuar vdekja e tij”, thuhet në konfirmimin e policisë.
Policia ka njoftuar se në vendin e ngjarjes kanë dalë njësitë relevante dhe hetuesit kompetentë, të cilët kanë ndërmarrë veprimet e nevojshme hetimore.
“Në vendin e ngjarjes dhe në institucionet shëndetësore kanë dalë njësitë relevante policore dhe hetuesit kompetentë, të cilët në koordinim me Prokurorin e Shtetit kanë iniciuar rastin ‘Hetim i Vdekjes’. Trupi i pajetë është dërguar në Institutin e Mjekësisë Ligjore në Prishtinë për obduksion”, ka njoftuar Policia e Kosovës.
