Një rast i ndershmërisë qytetare është shënuar të premten në Suharekë, ku një qytetare ka dorëzuar në polici para të cilat i kishte gjetur në rrugë.
Sipas njoftimit të Policisë së Kosovës, qytetarja V.F. nga fshati Peqan, duke kaluar pranë një restoranti në Suharekë, ka gjetur 300 euro para të gatshme në tokë dhe i ka dorëzuar ato në Stacionin Policor në Suharekë rreth orës 20:15.
Pas verifikimit të kamerave të sigurisë, policia ka arritur të identifikojë personin që i kishte humbur paratë, një qytetar nga Suhareka, të cilit më pas i janë kthyer mjetet financiare.
“Policia e Kosovës falënderon qytetaren për veprimin e saj shembullor dhe inkurajon të gjithë qytetarët që të ndjekin këtë model të ndershmërisë dhe bashkëpunimit me institucionet”, thuhet në njoftimin e policisë.
Tutje, policia rikujton se marrja e sendit të huaj, edhe nëse gjendet në rrugë apo në ndonjë vend tjetër, përbën vepër penale dhe është e dënueshme sipas Kodit Penal të Republikës së Kosovës.
