Një 69 vjeçar nga Komuna e Shtimes, ka dorëzuar në polici një armë të zjarrit për të cilën ai posedonte leje për armëmbajtje.
Sipas Policisë, qytetari, dorëzimin e armës së zjarrit e ka bërë në mënyrë vullnetare, për shkak të gjendjes së tij shëndetësore.
“Sektori i hetimeve nga stacioni i policisë në Shtime, nën autorizim të Prokurorisë Themelore në Ferizaj i ka kryer procedurat e nevojshme, për pranim-dorëzimin dhe arma e zjarrit e dorëzuar nga qytetari është deponuar në stacionin e policisë në Shtime për procedura tjera”, thuhet në njoftim.
Policia Rajonale e Ferizajt, ka falënderuar qytetarin për gjestin e mirë dhe gatishmërinë e tij për të dorëzuar armën e zjarrit që kishte me leje, në vendin e sigurt, në stacionin e policisë.
“Policia Rajonale e Ferizajt fton qytetarët për bashkëpunim dhe u bëjmë thirrje të gjithë atyre që posedojnë armë zjarri, nëse për arsye të ndryshme nuk munden të sigurojnë armën e tyre, të njoftojnë menjëherë policinë’’, thuhet në njoftimin e PK-së./teve1.info/
