Kontejnerët e stërmbushur me mbeturina i shoqërojnë me ditë të tëra banorët e Fushë Kosovës.
E këtë shqetësim fillimisht ata e ndanë në rrjete sociale.
Mirëpo sipas këtyre të fundit këta kontejnerë shihen të qëndrojnë në gjendje të tillë me ditë të tëra.
Kjo situatë e krijuar po e shqetëson banorin Naim Lushaku pikërisht për një arsye.
“Po qysh nuk jemi të shqetësuar këtu ka gjithkund mbeturina sidomos edhe në kontejnera edhe nuk i pastrojnë tamon qysh duhet, është shqetësuese sepse e kemi aty si oborr e po përzihen edhe fëmijët me mbeturina”, thotë ai.
Të njejtin mendim e ndanë dhe një qytetar tjetër.
“Gjendje jo e mirë po qashtu është tek ne mentaliteti i njerëzve që nuk kanë kujdes, gjithkund ka”, deklaroi qytetari tjetër, Shaip Maliqi.
Lidhur me këtë, nga Kompania Rajonale e Mbeturinave “ Pastrimi” thanë se mbeturinat inerte i largon komuna e Fushë Kosovës.
“Ju njoftoj qe Kompania “Pastrimi”, SH.A e konkretisht ne rastin konkret në Njësine e Fushë Kosovës nuk e ka përgjegjësi largimin e mbeturinave inerte si ne rastin konkret si ne foto, mbeturinat inerte ne Fushë Kosovë i largon Komuna e Fushë Kosovës. Kompania “Pastrimi”, bën largimin e mbeturinave te amvisërise-komunale dhe orari i shërbimit të largimit të këyre mbeturinave është duke u implementuar sipas planit operativ”, deklaruan nga Kompania Rajonale e Mbeturinave “Pastrimi”.
Ndërkohë banorët e Fushë Kosovës përballen me probleme të ndryshme për të cilat Tëvë1 kishte raportuar edhe herë të tjera, si reduktimi me ujë të pijshëm e uzurpimi i trotuareve.
