Deputeti i LDK-së, Anton Çuni ka thënë se nëse kryeministri ka qenë në dijeni për gjendjen e policëve dhe ka vazhduar njëjtë, atëherë i ka viktimizuar ata.
“A e ka ditur zotëri kryeministër këtë situatë, a është i njoftuar nga ministri i Punëve të Brendshme, zotëri Sveçla për këtë gjendje? Nëse e ka ditur, atëherë përgjegjësia bie komplet mbi kryeministrin. Pra do të thotë se kryeministri me vetëdije i ka viktimizuar dhe menjëherë lind pyetja e radhës: Për cilat qëllime politike janë viktimizuar?E nëse kryeministri nuk ka pasur njohuri, atëherë do të duhej të kërkonte llogari që nga ministri i Punëve të Brendshme, e tutje në tërë zinxhirin komandues”.
Ai ka thënë se për këtë situatë kryeministër ia ka borxh një shpjegim të arsyeshëm policëve të arrestuar, familjeve të tyre, partnerëve ndërkombëtare, por edhe “neve se pse e ka humbur orientimin në kohë dhe hapësirë. Pse hynë në beteja për qëllim me i humbur?” ka thënë ai në kuvend.
Ai ka treguar edhe një zgjidhje se si duhet organizuar policinë në atë pjesë.
“Me modesti dua që të tregojë se si duhet vepruar në raste të tilla nëse ka vullnet që të shtrihet sovraniteti në tërë territorin e Republikës së Kosovës. Së pari zgjidhen policë të trajnuar të motivuar dhe me shëndet të mirë. Pastaj forcat shumëfishohen dhe mbështetën nga njësit e veçanta. Për mobilitet përdorën mjete taktike të armatosura me armë të kalibrit më të fuqishëm. Lëvizjet kryesisht bëhen në këmbë, ndërsa ndërrimet bëhen natën. Ndryshohen rrënjësit rutina ditore, orari, vendkalimet, pikat e vëzhgimeve etj. Ndryshohet biseduesi i koduar, përdorën mjete më të sofistikuar të komunikimit, vëzhgimit dhe detektimit. Kalimet mbulohen nga kamera vëzhgimi, regjistrimi sizmik i lëvizjeve … përdorën qenë të stërvitur, ndërtohen pozicione mashtruese, ngritën njësi për intervenime të shpejta, sigurohen dhe shkëmbehen informata nga njësitë e inteligjencës me partnerët. Me një forcë të tillë të përgatitur dhe të motivuar askush nuk do të dëshironte të ndeshej më të në rrugë apo në male”.
