Formimi i Qeverisë Kurti 3 është çështje ditësh. Kështu ka thënë Vigan Qorrolli, zëvendësministër në detyrë i Drejtësisë.
Ai ka thënë se Kurti tashmë e ka të ideuar kabinetin qeveritar dhe se do ta marrë besimin për ta udhëhequr qeverinë e re në periudhën 4- vjeçare.
Qorrolli ka thënë se nuk mund të garantojë se sa vota do t’i ketë, por është ka thënë se është i sigurt që Kurti do ta marrë mbështetjen në Kuvendin e Kosovës për formimin e qeverisë.
“Besoj që kryeministri Kurti tashmë e ka ideuar kabinetin qeveritar dhe është çështje ditësh kur do të prezantohet në Kuvendin e Kosovës. Është çështje ditësh që Kurti do ta marrë besimin si mandatar i Qeverisë Kurti3 dhe i Qeverisë së Kosovës për periudhën 4- vjeçare. A do të jenë 61 numra, 65 a po 68 s’mund ta konfirmojë. Por, ajo çka mund të konfirmojë është se z. Kurti do ta merr miratimin e Kuvendit të Kosovës, ndërkohë që ne kemi bërë të ditur tashmë që prej prillit, ideja jonë e fundit janë zgjedhjet e jashtëzakonshme. Por, ne rast se nuk janë numrat siç pandehin disa ne jemi të gatshëm për zgjedhje”, ka thënë Qorrolli.
Ai ka thënë se seanca për formimin e qeverisë mund të thirret gjatë javës së ardhshme,por e sigurt që do të jetë para vikendit të ardhshëm.
Qorrolli ka thënë se ata janë në negociata me subjekte politike por edhe me deputetë që duan të votojnë.
Ai ka thënë se Nisma Socialdemokrate është treguar konstruktive, duke ju referuar një deklarate të deputetë Xhevahire Izmaku.
“Nisma ka treguar konstruktivitet dhe gatishmëri, madje edhe deputetja Xhevahire Izmaku e ka thënë se janë të gatshëm të hyjnë në qeveri pa asnjë kusht”, ka thënë Qorrolli.
Ai nuk e ka përjashtuar mundësinë që t’i dërgohet ofertë përsëri LDK-së, por ka përjashtuar çdo mundësi bashkëpunimi me PDK-në dhe Listën Serbe.
