Zëvendësministri në detyrë i Drejtësisë nga radhët e LVV-së, Vigan Qorrolli, ka komentuar debatet rreth moskalimit të buxhetit të Prishtinës, duke akuzuar Lidhjen Demokratike të Kosovës për krijim artificial të krizës.
Qorrolli tha në emisionin “Këndi i Debatit” në Tëvë1 se qeveria në detyrë e ka të drejtën e plotë kushtetuese për të propozuar buxhetin, ndërsa pretendimet e kundërta nga LDK-ja i cilësoi si të pabaza.
“Pse nuk ka kaluar buxheti? Legjitimiteti i qeverisë në detyrë e prodhon situatën që duhet ta kalojmë. Më thoni nëse ka një plan ‘B’? Nuk ka plan ‘B’, sepse askush tjetër, as me Kushtetutë, nuk mund të propozojë buxhet për vit kalendarik përveç qeverisë së Republikës,” u shpreh Qorrolli.
“I gjithë ky diskutim se kush mund ta bëjë buxhetin është një artificë politike e shkaktuar nga eksponentët e LDK-së. Shumica prej tyre janë ekonomistë me profesion, por ekonomistë të ngelur në klasë të parë,” shtoi ai.
Sipas tij, kjo qasje po transmetohet edhe te kryetari i Prishtinës, Përparim Rama.
“Këtë betejë politike ata e kanë bartur edhe te kryetari i zgjedhur, Përparim Rama, i cili ka nisur ta bëjë fushatën politike në mënyrën më të keqe të mundshme,” deklaroi Qorrolli.
Ai tha se LDK-ja po shkon drejt zgjedhjeve të 28 dhjetorit më e përqarë se kurrë, ndërsa këtë e lidh me një përpjekje të brendshme për të justifikuar rezultatet e mundshme.
“LDK-ja po hyn në një proces zgjedhor më të përçarë se asnjëherë më parë. Është një metamorfozë për t’u legjitimuar në rast të humbjes, e cila do të ndodhë me Lumir Abdixhikun. Kjo po shihet në disa palë zgjedhje dhe, sipas meje, do të shihet edhe më 28 dhjetor,” përfundoi Qorrolli.
Në deklaratat e tij, Qorrolli e konsideroi qëndrimin e LDK-së për buxhetin si të motivuar politikisht dhe të orientuar drejt përfitimeve elektorale.
