Zëvendësministri i Drejtësisë në detyrë, Vigan Qorolli, ka reaguar pas aktgjykimit të Gjykatës Kushtetuese që rikthen votimin e hapur për zgjedhjen e kryetarit dhe nënkryetarëve të Kuvendit.
Ai tha se në paragrafin e tretë të aktgjykimit, Gjykata ka urdhëruar që të gjithë deputetët e Kuvendit të Kosovës duhet të marrin pjesë në votim, dhe se çdo mospjesëmarrje përbën shkelje të Kushtetutës.
Megjithatë, ai kritikoi vendimin duke e cilësuar si tejkalim të autorizimeve kushtetuese të Gjykatës.
“Gjykata sot ka vendosur që të kthehet votimi i hapur. Por, tashmë në pjesën e dytë ose në paragrafin tre të aktgjykimit të gjithë deputetët e Kuvendit të Kosovës duhet të marrin pjesë në votim dhe çdo lirim nga kjo përgjegjësi nënkupton që është shkelje Kushtetute dhe tashmë të gjithë deputetët nënkupton që duhet me marrë pjesë në seancën konstituive dhe tash nuk mund të liroheni nga mospjesëmarrja e juaj në votim. Gjykata tashmë nuk ka thënë ‘obligoheni’, por ka urdhëruar. Ndonëse Gjykata nuk lëshon sanksione Kushtetuese, sepse nuk është e drejtë penale t’i dënojë deputetët që s’marrin pjesë në votim, por ka urdhëruar me fuqinë që ia jep Kushtetuta, ndonëse unë kam një interpretim tjetër që ai ka tejkaluar autorizimet e veta dhe ka ndërhyrë brutalisht në punën e Kuvendit në autonominë e Kuvendit”, tha ai në emisionin “Info Nata” në Tëvë1./teve1.info/
