QKUK ka shpallur tenderin për pastrimin e hapësirave me vlerë të parashikuar mbi 7.1 milionë, vlerë kjo rreth 50% më e lartë sesa në vitin 2020. E nga ShSKUK treguan disa faktorë të cilat sipas tyre e arseytojnë vlerën e këtij tenderi.
Ditë më parë Qendra Klinike Universitare e Kosovës, shpalli tender për pastrimin e hapësirave të objekteve.
Bazuar në këtë tender, mbi 7.1 milionë euro pritet të shpenzohen në mirëmbajtjen e klinikave.
Ai paraprak i vitit 2020 ishte për 50% më i ulët, në vlerë mbi 4.8 milionë euro .
Këtë rritje, përmes një përgjigje elektronike e ka arsyetuar Shërbimi Spitalor Klinik Universitar i Kosovës.
“Shtimi i hapësirave të QKUK-së prej 123045 m² në 142797 m². Ngritja e numrit të punëtorëve prej 319 në 326. Propozimi për ngritjen e pagave prej 302 euro bruto në 402 euro bruto. Materiali higjenik për nevojat e QKUK-së i cili ka qenë më parë kontratë e veqantë tani është e përfshirë në procedurat të tanishme tenderuese. Përpos specifikave dhe mjeteve për pastrim dhe dezinfektim të hapsirave në specifikat teknike të tanishme është i perfshirë edhe vinqi për pastrimin e dritareve nga ana e jashtme të obekteve, po ashtu OE duhet të deklaroj që dotë ketë një numër të puntorëve të trajnuar për infeksione intrahospitalore”, thuhet nga ShSKUK.
Ndërkohë njohësi i shëndetësisë, Bujar Vitia, thotë se shtimi i milionave, është bërë për shkak të disa mjeteve të pastrimit dhe dezinfektimit të hapsirave që nuk kanë qenë në tenderin e vitit 2020.
“Çfarë ka ndiku në rritjen e kësaj shifre është se janë rritur pagat e për 100 euro bruto më shumë sesa në tenderin e kaluar… Poashtu në tenderin e këtij viti janë shtuar edhe letrat për duar dhe letër për toalet, si dhe shamponi për larjen e duarve si dhe dezinfektatët për duar të cilat nuk kanë qenë në tenderin e kaluar”, thotë Vitia për Tëvë 1.
Edhe ish-ministri i Shëndetësisë, Armend Zemaj, thotë se duke parë raportimet për mirëmbajtje jo të mirë, shifra e tenderit duhet të arsyetohet.
“Mendoj që duhet të arsyetohet, dhe ky arsyetim vlen për gjendjen që egziston pastërtia në të gjitha klinikat në QKUK, duke parë raportime për jo mirëmbajtje të mirë dhe mbi bazën e kësaj dhe arsyeshmëria e çdo procedure tjetër duhet të jetë ky vlerësim”, ka thënë Zemaj për Tëvë 1.
Kontrata me kompaninë e cila fitoi tenderin e vitit 2020, skadon më 20 tetor të këtij viti.
