Mbrojtja Civile Italiane nëpërmjet Ambasadës së këtij shteti në Kosovë, i ka dhuruar sot Barnatores Qendrore të Qendrës Klinike Universitare të Kosovës, një sasi të konsiderueshme materialesh higjieno-sanitare, të përbëra nga 30 paleta me dezinfektues për duar. Vlera totale e këtij donacioni është rreth 80 mijë euro.
Ambasadori i Italisë në Kosovë, Maurizio Antonini tha se ky donacion do të kontribuojë në përmirësimin e shërbimeve shëndetësore për qytetarët e Kosovës dhe do të forcojë lidhjen e fortë midis dy vendeve.
Antonini tregoi se për vitin e ardhshëm kanë planifikuar mbështetje për shëndetësinë kosovare në vlerë mbi gjysmë milion euro.
“Donacioni i sotëm (30 paleta dezinfektues duarsh, me një vlerë totale rreth 80.000 euro) është bërë i mundur falë mbrojtjes civile italiane (protezione civile), e cila po mbulon gjithashtu të gjitha shpenzimet e transportit dhe të logjistikës. Dëshiroj të shpreh mirënjohjen time të sinqertë ndaj tyre për këtë kontribut bujar. Kjo nismë nuk është një gjest i izoluar. Ajo përshtatet në kuadrin më të gjerë të projektit “Mbështetje për sistemin shëndetësor të Kosovës”, përmes të cilit Italia po e asiston vazhdimisht Kosovën në forcimin e kapaciteteve të saj mjekësore. Brenda këtij programi kemi kontribuar në përmirësime të rëndësishme në kirurgjinë kardiake, si përmes trajnimeve të specializuara ashtu edhe përmes sigurimit të pajisjeve kyçe, si laboratori i sapo dhuruar i mikrobiologjisë. Gjatë pandemisë COVID-19, Italia qëndroi pranë Kosovës duke ofruar materiale mbrojtëse dhe mbështetje urgjente mjekësore, dhe pajisje të tjera me vlerë mbi gjysmë milion euro janë tashmë të planifikuara për vitin e ardhshëm për të konsoliduar këto arritje ”, tha ai.
Ministri në detyrë i Shëndetësisë, Arben Vitia shprehu falënderimin për popullin italian që shëndetësisë kosovare i ka qëndruar gjithmonë pranë.
Ai përmendi edhe bashkëpunimet e tjera që ndikojnë në edukimin e profesionistëve shëndetësor.
“Kjo është një ndihmë dhe bashkëpunim i cili është i bazuar në një bashkëpunim shumëvjeçar në mes të popullit italian dhe të Kosovës. Dhe po ashtu përmendën se në kohën e COVID-it kur edhe Italia përballej me një situatë mjaftë të rëndë, miqtë tanë nga Italia gjetën mundësi dhe forcën dhe na ndihmuan atëherë…..Me investimet në Klinikën e Kardiokirurgjisë ku sot Kardiokirurgjia është një nga klinikat model jo vetëm në Kosovë, po ashtu edhe më mikro-biologji klinike por edhe në shumë fusha tjera që Italia ka ndihmuar Kosovën…04’24Për herë të parë në këto dy vitet e fundit kemi filluar në bashkëpunim me ShSKUK-në, kemi ngritur një fond rreth 1 milion euro të ndara për profesionistët shëndetësor në Kosovë që të edukohen për ndërhyrje që deri sot nuk kanë mund të bëhen në Republikën e Kosovës. Investime në infrastrukturë dhe në mjete por sidomos aty ku nuk mund të zëvendësohet kurrë në resurset njerëzore”, shprehet Vitia.
Në ceremoninë e dhurimit të këtij donacionit ishin të pranishëm edhe përfaqësues të Mbrojtjes Civile Italiane, si dhe drejtori i përgjithshëm i Shërbimit Spitalor Klinik Universitar të Kosovës, Elvir Azizi dhe ushtruesi i detyrës së drejtorit të Qendrës Klinike Universitare të Kosovës, Mentor Zejnullahu./kp
