Qendra Klinike dhe Universitare e Kosovës (QKUK) ka njoftuar se në mesnatë ka ndodhur një incident në njërin nga repartet e Klinikës së Pediatrisë, ku ka shpërthyer një gyp i kanalizimit në hapësirat e korridorit.
Nga ky rast, sipas QKUK-së, ujërat e zeza nuk kanë depërtuar në dhomat ku po trajtohen fëmijët.
“Menjëherë kanë reaguar shërbimet e ekipeve teknike dhe ato të mirëmbajtjes, situata është vënë nën kontroll. Nuk ka pasur depërtim të ujërave në dhomat ku po trajtohen fëmijët. Pas intervenimit, korridoret janë pastruar dhe pritet të kryhet procesi i dezinfektimit, deratizimit dhe dezinsektimit (DDD), me qëllim që të garantohet higjiena dhe siguria e ambientit spitalor”, thuhet në njoftimin e QKUK-së.
Institucioni ka theksuar se po ndërmerren të gjitha masat e nevojshme për të garantuar sigurinë dhe higjienën në ambientet spitalore.
