Ministria e Jashtme qipriote tha të martën se ndihma humanitare ishte kontrolluar paraprakisht dhe do të transferohej në Gaza pa kontrolle shtesë sigurie sapo të mbërrinte në portin jugor izraelit të Ashdodit.
Ndihma do të shpërndahet nga Kuzhina Qendrore Botërore dhe ministria tha se procesi është pjesë e mekanizmit të shpërndarjes së ndihmës së Kombeve të Bashkuara, citon Al Jazeera.
Ndihma që do të mbërrijë në Ashdod është ofruar kryesisht nga Qiproja dhe Malta, me kontribute nga organizata në SHBA, Itali dhe Kuvajt.
Ndërkohë, situata në Gaza vazhdon të mbetet e rëndë, ku të hënën u regjistruan edhe tre vdekje të tjera të lidhura me urinë.
Kjo e ka çuar numrin total të viktimave të lidhura me urinë në 266, mes tyre 122 prej tyre fëmijë, njofton Ministria Palestineze e Shëndetësisë në Gaza.
