Gjithë këta njerëz erdhën të përcjellin Shehide Krasniqin, nënën e dy heronjve kombëtarë, Mujë e Ali Krasniqi në varrezat e fshatit Çabiq të Klinës.
Ajo ndërroj jetë mëngjesin e se shtunës.
E sa jetoi, i bëri krenarë gjithë shqiptarët me veprat heroike të saj dhe të bijve.
Andaj, e bija e Shehides, Selvetja e quan të ëmën nënë të Kosovës.
“Kjo ka qenë nëna e Kosovës jo vetëm e jona. Nuk ka qenë aspak e lehtë, ka qenë shumë sfiduese periudhat që kemi kaluar si familje. Mirëpo motivi i saj ka qenë çdoherë me bërë te pamundshmen të mundshme për vendin… Ajo ka qenë motivi dhe frymëzimi. Ajo është oksigjeni dhe liria që sot po jetojmë”, shprehet ajo.
Të përshëndetej me nënën heorike erdhi edhe shoku i komandant Kapuqit.
Naim Hasani, mik i heroit, Mujë Krasniqi tregon kujtimet me të ndjerën.
“Sot kemi ardhur ti japim lamtumirën e fundit nënës Shehide. Me Mujën kemi filluar që në ditët e para të UÇK-së. Kemi qenë pjesë e organizimit. Nëna Shehide na ka prit na ka përcjellë. Me gjithë dashurinë e me gjithë respektin. Ajo ka pas shpresa ka pas besimin e guximin. Ajo ka prit edhe ushtarët, ka ndarë gëzimin me djemtë kur kanë fitu nëpër beteja”, thotë Hasani
Por, kur flet për 81 vjeçaren, nuk e ka lehtë t’i mbajë lotët.
“Nëna Shehide sot është heroinë e Kosovës. Ajo ka lind hero dhe është heroinë e Kosovës. Sot ne e përcollëm për në amshim por ajo la veprat kujtimet dashurinë respektin e la besimin për njerëzit tanë”, shprehet Hasani.
Në këtë ceremoni varrimi, i pranishëm ishte edhe ministri i Mbrojtjes, Ejup Maqedonci.
Nuk mungoi as i pari i Aleancës për Ardhmërinë e Kosovës, Ramush Haradinaj së bashku me kryetarin e Klinës, Zenun Elezaj.
Këta, e quajtën të ndjerën shembull i madhështisë dhe dashurisë për atdheun.
Shehide Krasniqi vdiq në moshën 81 vjeçare. Në varrim u njoftua se e pamja do të zgjasë tri ditë.
