Para nga kuleta e shtetit, destinohen për veprime të pa arsyeshme të sektorit të drejtësisë.
117 persona të dënuar ose arrestuar pa arsye, janë kompensuar gjatë vitit 2023 me një total prej afro 35 mijë euro.
Shifër më e lartë, ka shkuar për ata persona që kanë pasur vendim gjyqësor.
“Lista e personave të dënuar ose arrestuar pa arsye të kompensuar sipas vendimeve gjyqësore gjatë vitit 2023, ka 18 persona, që vlera e përfituar në total tejkalon shifrën e 557 mijë eurove”.
Në këtë mes, shifra më e lartë që një person ka përfituar është 133 mijë e 919 euro.
E më e vogla, 240 euro.
Numër i madh i kërkesave për kompensim tek Këshilli Gjyqësor i Kosovës shkojnë çdo vit.
E në listë të pritjes për kompensim janë 33 persona.
Këta listohen si persona që nuk janë të përcaktuar ende në lidhje me ofertat e Komisionit për Kompensim dëmi gjatë vitit 2023.
Vlera e këtyre ofertave kapërcen 177 mijë euro.
Mirëpo, ka edhe persona që nuk janë pajtuar me vlerën e parave që Komisioni ka vlerësuar se u takon, raporton Tëvë1.
“Lista e personave të dënuar ose arrestuar pa arsye të cilët kanë refuzuar ofertat e komisionit për kompensim dëmi gjatë vitit 2023, përbëhet nga 9 persona. Vlera totale e parave që këta kanë refuzuar është 79 mijë e 740 euro”.
Refuzim ka pasur edhe nga Komisioni për Kompensim në kuadër të KGJK-së.
Gjithsej gjatë vitit që lamë pas, janë refuzuar 13 kërkesa për kompensim dëmi.
