Qendra për Informim, Kritikë dhe Aksion – QIKA, ka zhvilluar një aksion simbolik para objektit të Qeverisë së Kosovës, përmes të cilit ka kërkuar nga ministri i Financave, Hekuran Murati, heqjen e taksës për pecetat menstruale.
Sipas njoftimit të publikuar në Facebook, QIKA ka kërkuar që produktet menstruale t’i nënshtrohen normës së ulur të tatimit mbi vlerën e shtuar dhe që të lirohen nga tatimi doganor.
“Simbolikisht, ia sollëm 7.500 nënshkrimet e peticionit “Peceta nuk është luks” , si dhe vendimin të cilin Murati do të duhej të kishte vetë guximin dhe vullnetin që ta hartonte. Taksimi i produkteve menstruale është seksist. Shteti po takson funksionimin normal fiziologjik të grave dhe të gjithë personave që menstruojnë. Menstruacionet nuk janë zgjedhje, as higjiena menstruale nuk është luks, e si të tilla nuk mund te taksohen”, thuhet ndër të tjera në njoftim.
