Qeveria e Kosovës është shprehur e zhgënjyer pas vendimit që ka marrë Bashkimi Evropian, në lidhje me heqjen e vizave për serbët që jetojnë në Kosovë.
Klisman Kadiu, këshilltar i zëvendëskryministrit, Besnik Bislimi, për teve1.info ka thënë se janë të zhgënjyer me vendimin e marrë nga Bashkimi Evropian, teksa shtoi se pasaporta e serbëve e lëshuar nga Serbia vazhdon të mbetet ilegale, dhe do të vazhdojnë të mos njihen nga autoritetet e Kosovës.
“Shprehim zhgënjimin tonё me vendimin e marrë nga Bashkimi Evropian në lidhje me “liberalizimin e vizave” për mbajtësit e pasaportave ilegale të lëshuara nga autoritetet serbe, për qytetarët serb të Kosovës. Cilido vendim i Bashkimit Evropian, nuk e zhbën faktin që ato pasaporta vijojnë të mbeten ilegale, në shkelje të plotë të integritetit territorial dhe sovranitetit të shtetit tonë, e rrjedhimisht të papranueshme për Republikën e Kosovës. Ato pasaporta, do të vazhdojnë të mos njihen nga autoritetet tona”, ka thënë Kadiu.
Tutje, Kadiu thekoi se çdo qytetarë I vendit nga secili komunitet ka të drejtën e plotë të përfitoj nga lëvizja e lire pa viza përmes pasaportës së Republikës së Kosovës.
“Secili qytetar i vendit, nga secili komunitet, ka të drejtën e plotë që të përfitojë nga lëvizja e lirë pa viza, përmes pasaportës së Republikës së Kosovës. Andaj, justifikimi i përdorur se bartësit e këtyre pasaportave ilegale do të mbeten të izoluar, është i pasaktë dhe në shpërputhje me realitetin. Poashtu, e pashpjegueshme është dhe ngutia e shfaqur për marrjen e këtij vendimi, pa vërtetuar faktet në terren, pa analizuar implikimet qё munden dhe do tё pёrcjellin zbatimin e vendimit, dhe pa konsultuar që nga fillimi institucionet e shtetit tone”, deklaroi këshilltari i zëvendëskryeminsitrit të Kosovës.
Më tej,Kadiu ka thënë se ky vendim i dëmton përpjekjet e vazhdueshme për integrimin e komunitetit serb në Kosovë.
“Ky vendim, dёmton përpjekjet tona të vazhdueshme për integrimin e komunitetit serb në Kosovë. Republika e Kosovës po zbaton politika në fusha të ndryshme, të cilat po i sjellin qytetarët më pranë institucioneve, e gjersa dhe me liberalizimin e vizave për Kosovën, pati rritje të ndjeshme e të prekshme të qytetarëve nga komuniteti serb të cilët u pajisën dhe po pajisen me dokumentat e Republikës sonë”, ka thënë ai për teve1.info
Këshilli i BE-së merr vendim për t’ua hequr vizat serbëve të Kosovës
Ndryshe, sot Këshilli i Bashkimit Evropian ka vendosur në favor të heqjes së regjimit të vizave për qytetarët serb të Kosovës, të cilët posedojnë pasaporta të Serbisë.
Në komunikatën e bërë për media thuhet se vendimi është marrë në takimin e ministrave të jashtëm të BE-së./teve1.info
