Qeveria e Kosovës ka miratuar nismën për aderimin e Republikës së Kosovës në Konventën Ndër-Amerikane për Vuajtjen e Dënimeve Penale Jashtë Vendit.
Ministrja e Drejtësisë, Donika Gërvalla, ka bërë të ditur se kjo nismë synon forcimin e sundimit të ligjit, bashkëpunimit ndërkombëtar në çështjet penale dhe subjektivitetit ndërkombëtar të Kosovës.
Sipas Gërvallës, aderimi në këtë Konventë do të forcojë bashkëpunimin juridik ndërkombëtar në fushën e transferimit të personave të dënuar, duke u mundësuar atyre që dënimin ta vuajnë në shtetin e tyre të origjinës.
“Kjo Konventë synon forcimin e mëtejmë të bashkëpunimit juridik ndërkombëtar në fushën e transferimit të personave të dënuar, me qëllim që personat e dënuar të mund vuajnë dënimin në shtetin e tyre të origjinës, në përputhje me standardet ndërkombëtare dhe me respektimin e të drejtave themelore të njeriut”, ka deklaruar Gërvalla.
Ministrja ka theksuar se aderimi pritet të sjellë përfitime konkrete për Kosovën, veçanërisht në zgjerimin e bashkëpunimit juridik me shtetet e Amerikës Latine.
Sipas saj, kjo do të mundësojë që personat e dënuar të vuajnë dënimin më afër familjeve dhe shoqërisë së tyre, duke kontribuar në rehabilitimin dhe riintegrimin e tyre.
Po ashtu, aderimi në Konventë pritet të lehtësojë menaxhimin e sistemit korrektues dhe të ndikojë në uljen e kostove përkatëse.
Nisma është propozuar në mbledhjen e tretë të Qeverisë së Republikës së Kosovës./teve1.info/
