Qeveria po mbështet Agjencinë e Statistikave të Kosovës, me qëllim që regjistrimi i popullsisë të jetë sa më cilësor, profesional dhe gjithëpërfshirës.
Kështu deklaroi kryeministri i Kosovës, Albin Kurti, duke thënë se që të jetë i plotë suksesi i këtij procesi, duhet të ketë bashkëpunim të ngushtë ndërmjet ASK-së dhe komunave të vendit.
“Të dhënat mbi madhësinë, shpërndarjen dhe përbërjen e popullsisë, kushtet e jetesës, e nivelin e edukimit, do të na ndihmojnë në orientimin e politikave dhe shërbimeve më të mira për qytetarët. Po e mbështesim Agjencinë e Statistikave të Kosovës, me qëllim që regjistrimi të jetë cilësor, profesional dhe gjithëpërfshirës. Por, në mënyrë që të jetë i plotë suksesi i këtij procesi, me rëndësi qenësore për zhvillimin socio-ekonomik të vendit tonë, nevojitet bashkëpunim i ngushtë ndërmjet Agjencisë së Statistikave të Kosovës dhe komunave të Republikës. Andaj, sërish bëj thirrje për përkushtim dhe angazhim të përbashkët në një ndërmarrje tejet të rëndësishme institucionale të vendit tonë”, potencoi Kurti.
Po ashtu, kryeministri tha se angazhimi i përbashkët është i domosdoshëm për të adresuar nevojat e qytetarëve pa dallim dhe se vendime të tilla do të ndikojnë në të ardhmen e Kosovës.
Ndërkaq, sa i përket buxhetit të komunave për vitin 2024, Kurti bëri të ditur se granti i përgjithshëm për to është gati 285 milionë euro, e që sipas tij, është granti me vlerën më të madhe ndonjëherë.
“Na gëzon fakti që buxheti i komunave sivjet është 744 milionë euro, pra 195 milionë euro më shumë se sa në vitin 2021. Granti i përgjithshëm për komuna për vitin 2024 është gati 285 milionë euro, që njëherit është granti me vlerën më të madhe ndonjëherë. Ditë më parë nënshkruam marrëveshje me vlerë mbi 8 milionë euro me kryetarët e 11 komunave, përfituese të grantit të përformancës, për projekte që kanë të bëjnë për rregullimin dhe pastrimin e shtratit të lumenjve, ndërtimin e fushave sportive dhe rregullimin e ndriçimit publik. Pra, krahas rritjes së buxhetit dhe mbështetjes për zhvillim të komunave, rriten edhe mundësitë për rritje të mirëqenies sociale”, shtoi tutje Kurti.
Madje sipas tij, me rritjen e buxhetit dhe mbështetjen për zhvillim të komunave, njëherit do të rriten edhe mundësitë për rritje të mirëqenies sociale./teve1.info/.
