Kabineti qeveritar do të mblidhet sot në orën 09:00, në ndërtesën e Qeverisë së Kosovës, për të zhvilluar mbledhjen e shtatë
Në mesin e dokumenteve që do të jenë në shqyrtim janë projektligji për Agjencinë e Menaxhimit të Emergjencave, nga Ministria e Punëve të Brendshme, si dhe ai për themelimin e Inspektoratit Qendror të Bujqësisë, Sigurisë Ushqimore, Veterinarisë dhe Pylltarisë.
Pjesë e diskutimeve do të jetë edhe Programi për Vlerësimin Ex-Post të Akteve Juridike për vitet 2026-2028. Po ashtu, pritet të trajtohet propozimi për mbështetje financiare për Këshillin Kombëtar Shqiptar.
Në agjendë është përfshirë edhe një kërkesë e Ministrisë për Komunitete dhe Kthim, e cila ka të bëjë me shitjen ose tjetërsimin e nëntë automjeteve zyrtare që nuk janë më në gjendje pune.
Ministrat do të shqyrtojnë gjithashtu kërkesën e Agjencisë Kosovare të Privatizimit për kthimin e mjeteve financiare për Ndërmarrjen Shoqërore “Komogllava”.
Një tjetër temë që pritet të marrë vëmendjen e kabinetit qeveritar është harmonizimi i vendimit për zbatimin e sanksioneve ndërkombëtare me politikën e jashtme dhe të sigurisë së Bashkimit Evropian. Për këtë qëllim, është propozuar ndryshimi dhe plotësimi i vendimit ekzistues të Qeverisë.
Në fund, në rendin e ditës janë edhe dy propozime që lidhen me marrëveshjet për sigurime sociale ndërmjet Kosovës dhe Turqisë. Për këto marrëveshje, presidentja e Kosovës ka kërkuar autorizimin e ministrit të Punës, Familjes dhe Vlerave të Luftës Çlirimtare për nënshkrimin e tyre.
