Qeveria e Kosovës ka njoftuar se kryeministri Kurti i ka njoftuar ambasadorët dhe diplomatët e akredituar të misioneve diplomatike në Kosovë për qëndrimin e Qeverisë së Kosovës dhe gjashtë pikat për formimin e Asociacionit të prezantuara javën e kaluar edhe në Kuvendin e Kosovës.
Sipas komunikatës së Qeverisë në këtë takim temë kryesore procesi i dialogut dhe propozimi evropian/
“Temë qendrore e diskutimit ishte procesi i dialogut, propozimi evropian dhe rruga përpara.Kryeministri Kurti i njoftoi ata me qëndrimet e Qeverisë së Republikës së Kosovës përfshirë këtu edhe gjashtë pikat e prezantuara në Seancën e Kuvendit javën e kaluar në lidhje me marrëveshjen e Brukselit të vitit 2013”, thuhet në komunikatën e Qeverisë.
Ndër të tjerash, sipas komunikatës ai tha se Kosova ka dëshmuar përkushtimin e saj për dialog përmes qasjes konstruktive dhe propozimeve kreative.
Ai po ashtu shprehu gatishmërinë e tij për takime të radhës në Bruksel të nivelit të lartë politik dhe intensifikim të procesit të dialogut për normalizim të plotë të marrëdhënieve ndërmjet Kosovës dhe Serbisë me njohjen reciproke në qendër.
Kurti pas këtij takimi ka zhvilluar edhe një tjetër me përfaqësuesin e BE-së për dialogun, Miroslav Lajçak dhe ambasadorin e SHBA-së në Kosovë./teve1.info/
