Kuvendi i Kosovës i dha të mërkurën mandatin Qeverisë së re.
Në krye të saj do të jetë sërish lideri i Lëvizjes Vetëvendosje, Albin Kurti.
Më 66 vota për, 49 kundër dhe një abstenim u votua Qeveria “Kurti 3”.
Por, para votimit, Kurti fillimisht prezantoi kabinetin qeverisës.
Në këtë formë, kryeministri bëri të ditur se qeveria e re do të përbëhet nga 19 ministri.
E kjo nxiti kritika të ashpra, tek kundërshtarët e Kurtit.
“Rritja e numrit të ministrive tregon deri diku edhe hipokrizinë e partisë në pushtet e cila ka pasur kritikë të vazhdueshme se qysh është numri i madh i ministrave, zëvendësministrave, këshilltarëve. Unë, besoj që më rritjen e numrit të ministrive kemi me mas rritje të numrit të këshilltarëve të zëvendësministrave shumë më të madh. Sa i përket emërimit të ministrave në qeverisje autoritarë qysh është qeverisja e Kurtit, emrat e ministrave janë krejtësisht të parëndësishëm, ata e kanë veç një funksion, e ai është me i shërbye liderit e me qenë lojal ndaj tij”, tha Bardh Ahmeti nga PSD.
Por, sipas njohësve të çështjeve politike, duhet të shihet puna, e jo numri i ministrive.
“Nuk është e rëndësishme janë 9 apo 19, ky apo ia emër. Ne, nuk mund të paragjykojmë punën ose mos punën e ministrave që janë emëruar dje, duhet pritur dhe parë. Është paragjykuese të thuhet se ky është i qëlluar ose ai, ne jemi në demokracie dhe mund të themi. Nuk mendoj që është parësore, parësore është ajo çfarë synon dhe ajo se çfarë qeveria ka objektiv në këto katër vite, a ia ka qëlluar ende ka mundësi që ai program të pasurohet”, shprehet Melazim Koci – politolog.
Ndryshe, në vitin 2019, atëbotë Kurti si kandidat i Vetëvendosjes për kryeministër, premtoi vetëm 12 ministri.
Kjo gjë, iu kujtua të mërkurën mbrëma në foltoren e Kuvendit të Kosovës.
Ndryshe, përveç numrit të ministrive, ndryshime kishte edhe në emra.
Postin e ministres së arsimit, nga Arbërie Nagavci e mori Hajrullah Cekun, kurse Rozeta Hajdari u ndërrua me Mimoza Kusari-Lilën si Ministre e Tregtisë, Industrisë dhe Integrimeve Evropiane
