Sipas një komunikate të lëshuar për medie, ky është buxheti më i vogël që është ndarë për RTK-në në 10 vitet e fundit.
“Bordi i Radiotelevizionit të Kosovës shpreh shqetësimin lidhur me buxhetin e ndarë prej 8.96 milionë euro, i cili u miratua dje në lexim të parë në Kuvendin e Kosovës. Buxheti prej 8.96 milionë euro (aq sa ishte edhe për këtë vit) është buxheti më i vogël që i është ndarë RTK-së në 10 vitet e fundit. Ky buxhet është më i vogël për 2.2 milionë sesa buxheti i vitit 2021, kohë kur RTK-ja qartazi keqmenaxhohej”, thuhet në komunikatë.
Sipas njoftimit për medie, si pasojë e keqmenaxhimit gjatë viteve të kaluara janë trashëguar 1.6 milionë euro borxhe, të cilat sipas komunikatës, përbëjnë kërcënim konstant me bllokimin e xhirollogarive të RTK-së nga përmbaruesit.
“Bordi i RTK-së rikujton se kjo ndarje buxhetore përjashton mundësinë praktike të çfarëdo investimi kapital në RTK, qoftë në pajisje pune, teknologji të re, shpërndarje të sinjalit apo përmbajtje kualitative. Buxheti i ndarë, dhe të hyrat tjera vetanake nga marketingu, e as kursimet e planifikuara, nuk sigurojnë as plotësimin e kërkesës ligjore për kontraktim të produksioneve të pavarura, e as nuk sigurojnë shlyerjen e plotë të borxheve që janë krijuar nga menaxhmentet e kaluara ndër vite”, thuhet në komunikatë.
