Draft-statuti i Asociacionit të komunave me shumicë serbe do të mund të hartohet sipas vizionit të kryeministrit Albin Kurti, vetëm pasi që edhe Serbia të zbatojë në tërësi marrëveshjen. Kështu paralajmërojnë zyrtarë nga Qeveria e Kosovës, për Tëvë1.
Përmes kryeministrit Albin Kurti, Kosova ka shpalosur tashmë në Bruksel vizionin e saj në lidhje me vetmenaxhimin për komunitetin serb, por lëvizje tjera mund të priten vetëm pasi që edhe Serbia të nis me zbatimin e Marrëveshjes së Ohrit. Kështu të paktën, paralajmërojnë nga Qeveria e Kosovës pas kërkesave të vazhdueshme ndërkombëtare për hartimin e draft-statutit të Asociacionit.
Në një përgjigje për Tëvë1, në pyetjen nëse Qeveria ka filluar ta hartoj draftin që po i kërkohet, thuhet se ekzekutivi është i përkushtuar të punojnë në këtë drejtim, por vetëm nëse zbatimi i marrëveshjes është i plotë dhe i dyanshëm.
“Ne jemi të interesuar që të bashkëpunojmë për të formësuar edhe më tej vizionin për komunitetin serb në Kosovë për një nivel adekuat të vetëmenaxhimit sipas nenit 7. Por deri më tani nuk kemi një pajtueshmëri për sa i përket sekuencimit të zbatimit të Marrëveshjes Bazike, sikurse e parasheh edhe Aneksi i Zbatimit. Nuk mund të ketë përparim në zbatimin e njërit nen apo njërës pikë pa nisur zbatimi i tërësishëm i Marrëveshjes”, thuhet nga Qeveria.
Ambasadori amerikan në Beograd Christopher Hill, ka thënë se evropianët dhe amerikanët janë duke u marrë me asociacionin dhe sipas tij megjithëse nuk do të ketë përparim në çdo takim, në fund do ta kemi asociacionin”.
Amerikanët tash e sa kohë i kanë kërkuar kryeministrit të vendit Albin Kurtit që ta hartoj një draft- statut, por që deri më tani Qeveria ka propozuar vetëm një-draft vizion që është i bazuar në modelin kroat për menaxhimin e pakicave.
Për këtë dokument që Kurti e prezantoi me 2 maj, ka qenë ambasadori britanik Nicholas Abbott i cili i ka kërkuar kryeministrit që ta hartoj statutin, mbi bazën e këtij propozimi. Së fundmi një kërkesë të ngjashme e ka bërë edhe ambasadori gjerman në Kosovë Jorn Rohde, i cili tha se autoritetet kosovare duhet ta hartojnë sa më parë draftin në mënyrë që të shihet qëndrimi i Kosovës për këtë çështje.
Zyrtarët amerikanë në vazhdimësi kanë qenë të prerë për atë se asociacioni duhet të jetë brenda Kushtetutës së Kosovës dhe nuk duhet të krijoj një nivel të tretë të Qeverisjes.
