E besuara e Boris Johnsonit për të udhëhequr me politikën e jashtme të Britanisë së Madhe, që nga e marta e zëvendësoi ish-shefin në krye të qeverisë britanike.
Liz Truss u bë kryeministrja e katërt konservatore që nga viti 2015, në një kohë kur ekonomia britanike po shkon drejt një recesioni.
Politika e Britanisë së Madhe karshi Kosovës, sipas ambasadorit të parë të Kosovës atje, nuk pritet të ndryshojë pas këtij emërimi.
“Konservatorët, qeveria britanike, Britania edhe në kohën kur është drejtuar nga laburistët ka qenë përkrahëse e Kosovës, përkrah pavarësinë e integritetin territorial të Kosovës”, tha Hamiti.
Madje sipas tij, fakti që Britania e Madhe tashmë është jashtë BE-së i jep asaj mundësi që të ndikojë më shumë në arritjen e një marrëveshjeje finale me Serbinë.
“Duket paradoksale, mund të jetë në një pozitë më të mirë sepse nuk i ka shtrëngesat e politikës së përbashkët evropiane. Në kohën kur ka qenë pjesë e BE-së, sigurisht që edhe Britania si të gjitha vendet e tjera të BE kanë pasur politika të përbashkëta të jashtme dhe të sigurisë, tash që ndjek politika sovraniste është në një pozitë të mirë që t’i ndihmojë Kosovës për ta përmbyllur dialogun me njohje reciproke”, tha ai.
E për Daut Dautin, gazetarin nga Kosova që jeton e vepron në ishull, lajm i mirë për Kosovën është personi që Truss emëroi në krye të ministrisë së Jashtme.
“Një fakt tjetër që na shtyn të mendojmë se politika nuk do të ndryshojë ndaj Ballkanit dhe Kosovës është fakti që Liz Truss në pozitën e saj të mëparshme dmth si Sekretar të Jashtëm e ka emëruar një ministër të ri që ka qenë në detyrë më herët por tash është avancuar si Sekretar i Jashtëm, pra, James Cleverly”, theksoi Dauti.
Në dhjetor të vitit të kaluar, Britania emëroi për herë të parë një të dërguar special për Ballkanin Perëndimor, Sir Stuart Peach.
Kronika e realizuar nga Gojart Jashari.
