Kryeministri i Malit të Zi, Dritan Abazoviq, njoftoi se Qeveria e Malit të Zi ka miratuar të dielen tri marrëveshjet e lëvizshmërisë, të nënshkruara në kuadër të Procesit të Berlinit nga liderët e qeverive të gjashtë vendeve të Ballkanit Perëndimor.
“Ne duam që kufijtë midis njerëzve të jenë sa më pak të dukshëm ndërsa lëvizshmëria sa më e lartë. Unë garantoj se kjo është rruga e pajtimit dhe zhvillimit ekonomik. Pres që Kuvendi i Malit të Zi t’i ratifikojë me konsensus në kohë rekord”, ka shkruar Abazoviq në Twitter.
Ndryshe, më 23 shkurt, deputetët e Kuvendit të Kosovës, ratifikuan tri marrëveshjet e nënshkruara në Procesin e Berlinit – marrëveshjen për lëvizjen e lirë me letërnjoftime, njohjen e kualifikimeve të arsimit të lartë dhe njohjen e kualifikimeve profesionale të mjekëve, dentistëve dhe arkitektëve.
