Qeveria e Republikës së Kosovës ka reaguar ashpër ndaj thirrjeve raciste dhe anti-shqiptare që janë bërë së fundmi në Maqedoninë e Veriut, duke i cilësuar ato si të papranueshme dhe të rrezikshme për bashkëjetesën ndëretnike në rajon.
Zëdhënësi i Qeverisë në detyrë, Përparim Kryeziu, në një përgjigje për Tëvë1 ka thënë se veprime të tilla cenojnë thellësisht vlerat e një shoqërie demokratike dhe multietnike.
“Për Qeverinë e Republikës së Kosovës, thirrjet të tilla raciste e anti-shqiptare janë të papranueshme, cenojnë bashkëjetesën dhe bashkëpunimin ndëretnik, andaj edhe janë e duhet të jenë të dënueshme,” ka deklaruar Kryeziu.
Ai ka mirëpritur reagimet dhe dënimet publike të krerëve më të lartë të institucioneve të Maqedonisë së Veriut, si dhe veprimin e Prokurorisë Themelore për nisjen e hetimeve në drejtim të identifikimit dhe ndëshkimit të përgjegjësve.
“Mirëpresim reagimin dhe dënimin publik ndaj brohoritjeve anti-shqiptare nga krerët më të lartë të institucioneve të Maqedonisë së Veriut dhe aktivizimin e prokurorisë themelore atje për të zhvilluar hetimet dhe për vënë përgjegjësit para drejtësisë – si garanci që gjuha e urrejtjes në një shoqëri demokratike, multietnike dhe shtet ligjor është e dënueshme dhe e patolerueshme,” shtoi ai.
