Kryeministri i Kosovës, Albin Kurti, ka marrë pjesë në prezantimin e Fondit Sovran para përfaqësuesve të organizatave dhe biznese.
Në këtë tryezë është diskutuar për objektivat, organizimin dhe ndërlidhjen e bizneseve private me Fondin Sovran.
Gjithashtu, është thënë se ndërmarrjet publike së bashku me 24 mijë asete tjera do barten nga qeveria në Fond, që do të rrisë mundësinë e investimeve dhe përmirësojë edhe më shumë menaxhimin e tyre.
“170 shtete të botës, nga rreth 200 sa janë gjithsej, tashmë kanë fonde sovrane. Trendi më i lartë i formimit të fondeve sovrane është shënuar në fillim të viteve 2000. Dy dekada pas, Kosova do të jetë pjesë e shumicës së botës dhe e trendit global”, thuhet në komunikatë.
“Me 7 maj, u mbajt konferenca për themelimin e Fondit Sovran. Konsultimet publike për Projektligjin për Fondin Sovran tashmë kanë përfunduar dhe shpejt do të miratohet në Qeveri. Fondi Sovran është projekti më i madh ekonomik ndonjëherë në vend”.
Të pranishëm në këtë ngjarje ishte edhe shefja e Grupit Parlamentar të Lëvizjes Vetëvendosje, Mimoza Kusari-Lila, drejtuesi i grupit punues të Koncept-dokumentit për Fondin Sovran, profesor Besnik Pula dhe koordinatorja e Grupit Punues juridik të Fondit Sovran, Rrezarta Pllana. /teve1.info/
