“Secili punëtor publik dhe familja e tij janë subjekt i hetimit nga Byroja e Partisë”, tha Partia Socialdemokrate përmes një aksioni simbolik që zhvilloi sot para ndërtesës së Kuvendit të Kosovës. Kryetari i PSD-së, Dardan Molliqaj tha se Byroja nuk është shtetërore por politike e shantazhit ndaj qytetarëve të Kosovës.
Fillimisht erdhën policët.
E më pas nuk vonuan edhe anëtarët e Partisë Socialdemokrate.
Këta të fundit para hyrjes së Kuvendit të Kosovës vendosën pankarta në lidhje me projektligjin për Byronë e Konfiskimit të Pasurisë së Pajustifikueshme.
Kryetari i PSD-së, Dardan Molliqaj tha se Byroja “nuk është shtetërore por politike, e shantazhit ndaj qytetarëve të Kosovës”.
“Kjo byro nuk është byro shtetërore, kjo është byro politike e shantazhit ndaj qytetarëve të Republikës së Kosovës. Kur ke për synim drejtësinë, ajo është shumë më e qartë. Me një ligj këta duan që secilin polic, ushtar, punonjës teknik në shkolla, mësimdhënës, secilin mjek, qytetar që merr në një formë apo tjetër para nga shteti i Kosovës ose ka marrë nga viti 2008 kur është shpallur pavarësia e Kosovës është i dyshuar për qeverinë e në fakt për byronë e partisë”, tha Molliqaj.
Sipas Molliqajt, qeveria dëshiron të ketë instrument qeveritar ligjor për të shantazhuar kundërshtarët e tij politik dhe institucionet e pavarura.
“Çka po dëshiron të synojë partia në pushtet me këtë, as drejtësi, as luftë korrupsioni, as konfiskim të pasurisë, është duke dashur të ketë instrument qeveritar ligjor për të shantazhuar së pari kundërshtarët e vet politik dhe institucionet e pavarura”, tha ai.
I gjithë aksioni përfundoi qetë dhe anëtarët e PSD-së u shpërndanë.
Gjatë seancës së sotme të Kuvendit ishte në plan të bëhet shqyrtimi i parë i Projektligjit për Byronë Shtetërore për Verifikimin dhe Konfiskimin e Pasurisë së Pajustifikueshme.
Por, punimet e seancës u ndërprenë në mesditë për të vazhduar të hënën.
