Pas përfundimit të bastisjes në shtëpinë e Ismail Sylës, ish-këshilltar i ish-presidentit Hashim Thaçi, avokati Artan Qerkini bëri të ditur se është konfiskuar një telefon.
Sipas tij, Syla dhe disa ish-këshilltarët e tjerë po bastisen edhe pse nuk e kanë statusin e personit të dyshuar. Kjo siç thotë ai, është shkelje kushtetuese dhe ligjore, përcjell teve1.info
“Asgjë nuk është konfiskuar përveç se një telefon. Telefoni i përket Sylës. Asgjë tjetër pos një telefoni nuk është konfiskuar, dhe të jeni të bindur se edhe po ta ftonin Sylën që ta dorëzoj atë telefon, do ta bënte një gjë të tillë. Madje po e përsëris që edhe ai, siç edhe Behrami e disa të tjerë, nuk e kanë fare statusin e personit të dyshuar, por edhe përkundër faktit që nuk e kanë statusin e personit të dyshuar, ata po bastisen. Mendoj se kjo është shkelje kushtetuese dhe ligjiore, mirëpo ne këto shqetësime do t’i adresojmë përmes mjeteve jurdike në fazën adekuate të procedurës”, deklaroi ai.
Qerkini potencoi se arsyeja e bastisjeve është se nga ZPS-ja mendojnë “se mund të gjinden prova me relevancë për procedura të cilat janë duke u zhvilluar pranë Dhomave të Specializuara”.
Ka përfunduar bastisja e nisur mëngjesin e sotëm nga Zyra e Prokurorit të Specializuar në shtëpinë e Ismail Sylës, ish-këshilltar i ish-presidentit Hashim Thaçi.
Ditëve të fundit ka pasur bastisje edhe te ish-këshilltarët tjerë të ish-presidentit Thaçi, Artan Behrami, Blerim Shala dhe Bashkim Smakaj. /Teve1.info/