Hazbije Qeriqi, anëtare e Agjencisë së Statistikave të Kosovës, është deklaruar pas përfundimit të procesit për regjistrimin e popullsisë në Kosovë.
Në një intervistë për emisionin “Ditari”, Qeriqi u shpreh se stafi i ASK-së sot do të punon deri në orët e vona, në mënyrë që qytetarët të regjistrohen pa ndonjë pengesë.
Ajo tutje ka thënë se nuk ka marrë asnjë përgjigje nga Qeveria, që të ketë shtyrje të afatit për regjistrim.
“Jo, deri më tani ne nuk kemi marrë asnjë përgjigje nga Qeveria, dhe ne mendojmë që procesin e regjistrimit të popullsisë ta përmbyllim sot. Stafi i Agjencisë së Statistikave është duke punuar deri në orët e vona në mënyrë që qytetarët, të vinë në zyrën e ASK-së që të regjistrohen pa ndonjë pengesë. Procesi ka shkuar mirë, ne deri më tani është duke vazhduar ende, qytetarëve që nga java e fundit u është ofruar mundësia që ata që rastësisht kanë mbetur të paregjistruar, të vinë në zyre e ASK-së dhe të regjistrohen në ambientet tona, përndryshe të gjithë regjistruesit që kanë kryer obligimet e tyre kanë filluar me mbikëqyrësit e tyre t`i mbledhin tabletë dhe t`i dorëzojnë në ASK”, deklaroi Qeriqi.
Derisa shtoi se Qeveria mund të dërgojë deri në orët e vona ose deri të shtunën në mëngjes një përgjigje për shtyrjen e afatit për regjistrim.
“Ne mendojmë që deri në orët e vona Qeveria mund të dërgojë një përgjigje ose deri në mëngjes, mirëpo ne si ASK sot e përmbyllim procesin, në qoftë se nuk na vjen një përgjigje nga Qeveria. Kërkesa për zgjatjen e afatit ka pasur dhe iu kanë bashkangjitur edhe komunat e tjera, mirëpo këto kërkesa janë shqyrtuar dhe iu është dorëzuar Qeverisë, tani mbetet në dorën e Qeverisë që ta zgjasë apo jo”, shtoi ajo.
Ndryshe, ajo ka thënë se për herë të parë ASK-ja ka punuar me një metodologji të re për mbledhjen e të dhënave, e cila ka qenë tabletë.
“Ne jemi të kënaqur me gjithë procesin e popullsisë, sepse ka pasur sfida, kemi pasur edhe ne vetë frikën se mund të na bie rrjeti, mund të mos na funksionojë mirë pajisjet elektronike. Për herë të parë ne kemi punuar me një metodologji të re që ka qenë metodologjia për mbledhjen e të dhënave përmes tabletave, natyrisht se edhe ne kemi pasur frikën tonë, mirëpo deri më tani gjithë procesi është kryer për 6 javë, gjithçka ka shkuar mirë, kemi qenë të kënaqur me punën e stafit përgjegjës”, theksoi Qeriqi./teve1.info/
