Kandidati i Partisë Demokratike të Kosovës për deputet, Gëzim Qerimi, ka theksuar se shoqëria kosovare nuk e duron përçarjen dhe se vendi ka nevojë për politika që sjellin zhvillim ekonomik dhe stabilitet.
Sipas Qerimit, PDK do të vazhdojë të fokusohet në zhvillimin e qëndrueshëm ekonomik si bazë të të gjitha premtimeve të saj.
Ai ka premtuar rritje të pagave për të gjithë sektorin publik në masën 50 për qind, si dhe rritje të mbështetjes për kategoritë sociale.
Qerimi ka kritikuar qeverisjen e Lëvizjes Vetëvendosje, duke thënë se slogani i saj nuk përputhet me realitetin e gjashtë viteve të fundit të qeverisjes.
“Shoqëria e Kosovës nuk e duron përçarjen, ne edhe përpara do të vazhdojmë në zhvillimin ekonomik, premtime prej premtimeve bazë është zhvillim i qëndrueshëm ekonomik, do të ketë rritje të pagave për gjithë sektorin publik, për të gjitha kategoritë për 50%, do të ketë rritje për kategoritë sociale. Slogani i VV-së në realitet mendoj që për gjashtë vite të qeverisjes, veprimet e tyre tregojnë që kjo qeverisje nuk sjell as siguri e as begati, slogani i VV-së është kundërpërgjigje e sloganit tonë”, ka deklaruar Qerimi në emisionin “Ditari” në tëvë1.
Në zgjedhjet e 28 dhjetorit, Qerimi beson se Kosovën do ta udhëheq kandidati për kryeministër, Bedri Hamza.
Ai thotë se PDK-ja së do të jetë në koalicion së bashku me LDK-në dhe AAK-në, duke thënë se partitë opozitare kanë një qëndrim të përbashkët.
“Po, unë besoj gjasat janë maksimale që do të kemi një qeveri të udhëhequr nga Bedri Hamza dhe PDK-ja në koalicion së bashku me LDK dhe AAK, shpresoj që në të njëjtën kohë t’i kemi numrat për zgjedhjen e presidentes, besoj që partitë opozitare të gjitha kanë një qëndrim të përbashkët”, ka shtuar ai në fund./teve1.info/
