Ai në një intervistë për Zërin e Amerikës, ndër të tjera ka thënë se liderët e Kosovës dhe Serbisë duhen të marrin vendime të vështira, madje sa i përket çështjes së asociacionit, ai tha se është prioritet i SHBA-së. E në lidhje me propozimin e BE-së për dialogun, Schollet tha se do të ketë në bazë njohjen reciproke.
Profesori universitar Dritëro Arifi thotë se deklaratat e zyrtarit amerikan janë vetëm vazhdimësia e qëndrimeve amerikane karshi çështjes së dialogut.
“Atë që e ka thënë këshilltari Chollet e kanë thënë edhe dy letrat e presidentëve të SHBA-ve, ajo e ish-presidentit Trump dhe presidentit Biden, po ashtu edhe letra e sekretarit Blinken, pra kjo është vazhdimësia që po tregon Amerika në këtë proces. Po ashtu kërkimi i vendimeve të vështira është kërkuar vazhdimisht nga SHBA, sidomos për palën kosovare që të jetë më proaktive në dialog, pra në kuptimin e asaj që të jetë kreative dhe fleksibile, që i bije të zbatohen të gjitha marrëveshjet që janë nënshkruar”, ka thënë Arifi.
E njohësi i çështjeve politike Gazmir Raci, thotë se pengesë për vazhdimin tutje në dialog është qasja e Serbisë, ndaj disa prej elementeve të planit franko-gjerman.
“Unë nuk mendoj që problemi tani është te zbatimi i obligimeve nga e kaluara, por problemi është te ato pikat e rëndësishme të respektimit të sovranitetit dhe integritetit territorial të njëra tjetrës dhe këtu duket që Serbia, përmes barrikadave së fundi tentoi ta sabotoi fillimin e dialogut dhe që duket që ka problem t’i kapërdije këto dy elemente të rëndësishme integriteti territorial dhe njohja e simboleve”, ka deklaruar Raci.
Chollet së shpejti pritet ta vizitojë Republikën e Kosovës, Maqedoninë e Veriut dhe Serbinë.
Kronika e gazetarit Valmir Gallopeni.
