Kandidatja për deputete nga Alternativa, Diana Qarkagjija, ka deklaruar se vendimi i Komunës së Prishtinës për zbatimin e mësimit tërëditor është marrë pa përgatitjen e duhur.
Qarkagjija, e cila thotë se është pjesë e fushës së arsimit që nga viti 1990, vlerëson se përvoja e saj 20-vjeçare në zhvillim profesional e ka shtyrë të angazhohet edhe politikisht për të kontribuar në këtë sektor.
Sipas saj, modeli aktual i mësimit tërëëditor në Prishtinë nuk i plotëson kriteret për t’u konsideruar si i tillë.
“Vendimi ka qenë i ngutshëm. Nuk janë kushtet e mjaftueshme dhe të pjekura për të bërë një gjë të tillë. Kërkohet rregullim i infrastrukturës dhe adoptimi i hapësirave që fëmijët të kenë komoditet.”
Qarkagjija theksoi se orari i tanishëm nuk zgjidh problemin e prindërve që punojnë gjatë ditës.
“Fëmijët shkojnë në shkollë në 08:30 dhe lirohen në 14:30. Kjo prapë mbetet pengesë për prindërit që duhet t’i marrin vetë”.
Ajo sugjeron që shkollat të përshtaten gradualisht për mësim tërëditor, duke filluar nga komuna pilot, në vend se nisma të zbatohet menjëherë në shkallë të gjerë.
“Shkollat duhet të adaptohen hap pas hapi, jo siç është vepruar në Prishtinë”, tha Qarkagjija. /teve1.info/
