Kandidati për deputeti i Partia Demokratike e Kosovës, Rashit Qalaj, ka kritikuar vendimet e marra nga kryeministri në detyrë Albin Kurti gjatë mbledhjes së Qeverisë, në kuadër të pakos “Përballje me Inflacionin 2.0”.
Në emisionin “Info Nata” në Tëvë1, Qalaj tha se këto veprime janë të paligjshme dhe, sipas tij, përbëjnë “blerje votash”.
“Unë po flas gjithmonë për veprime ilegale, për veprime që e dëmtojnë ekonominë e vendit. Për mua këto janë blerje votash dhe kjo është e keqe për fushatën. Ne vazhdimisht kemi kërkuar, si deputetë tanë, si kryesi e PDK-së dhe kryetari i PDK-së, që të ndalen këto manipulime me buxhet”, ka deklaruar Qalaj.
Ai shtoi se pagat, pensionet dhe skemat sociale duhet të rriten në përputhje me krizën ekonomike dhe inflacionin.
“Premtimet tona elektorale kanë qenë dhe janë që të gjitha kategoritë që marrin para nga buxheti i shtetit të kenë rritje prej 50 për qind. Po ashtu, duhet të stimulohen edhe pagat në sektorin privat”, tha ai.
Qalaj kritikoi edhe shtesat e fundit financiare të miratuara nga Qeveria, duke i cilësuar si vendime me prapavijë elektorale.
“Ka pasur rritje, por këto lloj shtesash që po jepen vetëm në prag të zgjedhjeve janë elektorale. U dha paga e 13-të, ndërsa tash po flitet edhe për pagën e 14-të. Vendi i dytë më i varfër në Evropë planifikon të japë pagën e 14-të – nuk kam dëgjuar kurrë për këtë”, u shpreh ai.
Sipas Qalajt, mbetet e paqartë se nga cili buxhet po planifikohen këto pagesa, pasi ende nuk ka ndodhur rishikimi i buxhetit.
“Duhet të jemi të kujdesshëm me buxhetin e shtetit”, përfundoi Qalaj.
