Qalaj në emisionin “Këndi i Debatit” në Tëvë1, ka thënë se ky është sulmi i parë që i është bërë në mënyrë direkte me qëllim për t’i vrarë policët e Kosovës.
Sipas tij, ky është një tentim vrasje direkte ndaj Policisë së Kosovës.
“Ky është sulmi i parë që është bërë në mënyrë direkte që ka pasur për qëllim për t’i vrarë policët, askush nuk mund t’i jep asnjë shpjegim tjetër përveçse tentim vrasje direkte ndaj policisë së Kosovës. Janë shqetësuese sidomos përdorimi i armëve automatike dhe granatave të dorës në drejtim të policisë, ka qenë fat i madh që vetura ka qenë e blinduar”, tha ai.
Ai thotë se këto incidente nuk janë të rastësishme por janë incidente të orkestruara nga brenda Kosovës dhe jashtë saj.
“Situata si e tillë edhe si Drejtor i Policisë edhe si deputet në fakt është shqetësuese, jo për faktin se e kemi situatë të jashtëzakonshme në vend, unë e vlerësojë që situata e sigurisë është mjaft e qetë, mirëpo këto për mua nuk janë incidente të rastësishme, por janë incidente që janë të orkestruara nga brenda Kosovës dhe nga jashtë Kosovës që dihet nga Serbia me strukturat e saj që i ka në dispozicion. Kur them nga brenda Kosovës janë grupet kriminale të përkrahura edhe nga politika lokale në Mitrovicë të Veriut”, tha Qalaj.
Deputeti i PDK-së, thekson se në raste të tilla të sulmeve, Policia e Kosovës me armët që ka duhet të gjuajnë në mënyrë që të eliminojnë rrezikun.
“E kam përcjell konferencën e drejtorit dhe ministrit të Punëve të Brendshme, kanë shpjeguar se si ka ndodhur rastin me një përjashtim që nuk ka qenë e saktë nga drejtori, deklarimi i tij ka qenë që ka pasur patrulla të përziera multietnike që ka pasur edhe polic të komitetit serb, por informatat që i kam ka qenë në veturë ka qenë vetëm një polic i komitetit boshnjak që në fakt tregon diçka tjetër. Në situata të tilla patrullat të jenë të kombinuara. Në raste të tilla gjithmonë duhet policia e Kosovës me armët që i kanë të zbrazin edhe ata të gjuajnë me armë në mënyrë që të eliminojnë rrezikun për jetë”, ka thënë Qalaj. /teve1.info/
