Rashit Qalaj nga Partia Demokratike e Kosovës ka deklaruar se nëse subjekti i tij fiton zgjedhjet e parakohshme parlamentare më 7 qershor, Kosova do të sigurojë stabilitet politik dhe zgjedhje të rregullta vetëm pas katër vitesh.
Në emisionin “Info Nata” në Tëvë1, Qalaj është shprehur i bindur se Lëvizja Vetëvendosje do të marrë një “përgjigje masovike” nga qytetarët në këto zgjedhje, duke vlerësuar se rezultati do të reflektojë pakënaqësinë e votuesve.
Ai ka shtuar se PDK-ja synon të dalë forcë e parë në zgjedhje dhe se fushata do të intensifikohet në ditët në vijim.
“Ne jemi duke garuar që të udhëheqim me këtë vend dhe nuk ka ndonjë alternativë tjetër. Presim dhe po punojmë që të dalim të parët. Sa i përket përqindjes është herët të flitet, por për të dalë e para duhet një përqindje e mirë dhe jemi duke punuar shumë. Do t’i ndezim motorët edhe më shumë, duke qenë se pas dy ditësh hyjmë zyrtarisht në fushatë zgjedhore. Unë mendoj që Vetëvendosje do të marrë një përgjigje masovike kundër nga populli i Kosovës. Jam i bindur fort që nëse arrijmë të bindim popullin e Kosovës dhe të marrim votën ashtu siç po planifikojmë, Kosova do të ketë zgjedhje pas katër vitesh”, ka thënë ai./teve1.info/
