Deputeti i PDK-së, Rashit Qalaj ka thënë se nuk pret shumë nga takimi i 27 shkurtit mes Kosovës dhe Serbisë në kuadër të dialogut në Bruksel. Sipas tij, në këtë takim do të sqarohen pak më shumë se çfarë përmban plani evropian.
“Është krijuar një përshtypje se më 27 shkurt do të firmoset kjo marrëveshje mes Kosovës dhe Serbisë, unë nuk mendoj se kjo do të ndodhë. Mendoj se do të jetë një takim i radhës ku disa gjëra do të sqarohen pak më shumë se çfarë përmban ky raport”, ka thënë Qalaj.
Sipas tij, pala kosovare duhet të insistojë që marrëveshja të përfundojë me njohje reciproke de-jure
“Mendoj se pala kosovare duhet të jetë më e kujdesshme dhe ju i keni parë disa deklarime të kryeministrit të vendit, i cili e ka pranuar se marëveshja nuk para sheh njohjen de-jure dhe unë mendoj se pala kosovare duhet të insistojë se kjo marrëveshja duhet të përfundojë me njohjen reciproke, njohjen de-jure mes Kosovës dhe Serbisë”, ka deklaruar ai në emisionin “Ditari” në Tëvë1.
Madje, sipas Qalajt ndërkombëtarët nuk e kanë trajtuar drejt Kosovën në vitet e fundit.
“Kur të arrihet marrëveshja gjithëpërfshirëse mes Kosovës dhe Serbisë ajo që ne e dëshirojmë, Serbia nuk mund të jetë më faktor pengues për anëtarësim në organizata ndërkombëtare. Ndërsa kjo njohja de-fakto lë shumë për të dëshiruar, Kosova nuk do të jetë pjesë e OKB-së, nuk do të njihet nga pesëshja…Mendoj se ne si Kosovë kemi bërë kompromise mjaft, kemi afirmuar të drejtat e komuniteteve sidomos të atij serb dhe mendoj se çdo hap për t’i dhënë koncesione tjera do të ishte i gabuar”.
“Edhe pala ndërkomëbtare nuk ka qenë e drejt se si e ka trajtuar Kosovën gjatë tërë procesit të dialogut, sidomos në këto vitet fundit. Ata duhet të dinë se në këtë vend ka pasur një luftë, një agresion, gjenocid nga pala serbe”, deklaroi Qalaj.
