Duda Balje ka reaguar pas vendimit të Panelit Zgjedhor për Ankesa dhe Parashtresa (PZAP), i cili ka refuzuar ankesën e Koalicionit VAKAT ndaj vendimit të Komisionit Qendror të Zgjedhjeve (KQZ) për mosregjistrimin e Ena Krasniqit në listën e kandidatëve për deputetë të këtij subjekti politik.
Balje ka vlerësuar se veprime të tilla përbëjnë precedentë të rrezikshëm për komunitetin boshnjak, por edhe për komunitetet e tjera pakicë në Kosovë.
Ajo ka theksuar se kjo ishte përpjekja e dytë radhazi e Koalicionit VAKAT për të kontestuar vendimin e KQZ-së, duke e cilësuar këtë si tentativë për manipulim politik dhe ligjor.
Sipas saj, përmes këtyre veprimeve po tentohet të mohohet e drejta kushtetuese e boshnjakëve për përfaqësim përmes vendeve të rezervuara në Kuvendin e Kosovës.
Balje ka theksuar se mbetet e paqartë nëse këto iniciativa janë të motivuara nga frika politike, interesa të ngushta apo nga një qëllim i vetëdijshëm për ta margjinalizuar këtë komunitet në jetën politike të vendit.
Ajo ka paralajmëruar se pasoja e veprimeve të tilla nuk është vetëm politike, por edhe shoqërore, pasi cenon besimin ndërmjet komuniteteve dhe dëmton parimet e barazisë, drejtësisë dhe rendit demokratik.
“Mbetet e paqartë nëse këto veprime janë të nxitura nga frika politike, interesat e ngushta apo nga një qëllim i vetëdijshëm për t’i shtyrë boshnjakët në margjinat e jetës politike të Kosovës, por është e qartë se përpjekje të tilla përfaqësojnë një precedent të rrezikshëm, të rrezikshëm jo vetëm për boshnjakët, por edhe për të gjitha komunitetet e tjera minoritare në Kosovë”, ka shkruar ajo në Facebook.
