Paneli Zgjedhor për Ankesa dhe Parashtresa ka konfirmuar vendimin e Komisionit Qendror të Zgjedhjeve për të mos certifikuar listën opozitare serbe “Bashkë fitojmë” për zgjedhjet parlamentare të 7 qershorit. Ankesa e kësaj liste është refuzuar me arsyetimin se nuk janë përmbushur kushtet ligjore të nevojshme për regjistrim në garë zgjedhore.
Sipas institucioneve zgjedhore, lista kishte paraqitur 1.087 nënshkrime mbështetëse, por gjatë procesit të verifikimit janë konstatuar parregullsi të shumta. Një numër i konsiderueshëm i formularëve nuk përmbanin të dhëna të plota kontaktuese, ndërsa disa persona të kontaktuar nga autoritetet kanë deklaruar se nuk kishin dhënë nënshkrimin e tyre.
KQZ-ja kishte kërkuar plotësimin e dokumentacionit dhe korrigjimin e mangësive të evidentuara, por sipas vendimit, këto kërkesa nuk janë përmbushur brenda afatit të caktuar.
Në këtë listë opozitare bënin pjesë disa subjekte politike dhe iniciativa qytetare serbe, përfshirë Demokracinë Serbe, Lëvizjen Popullore Serbe dhe iniciativën “Veriu për të Gjithë”.
Përfaqësuesit e “Bashkë fitojmë” kanë kundërshtuar vendimin, duke deklaruar se kanë dorëzuar mbi 1.400 nënshkrime dhe se kërkesa për numra telefoni të nënshkruesve nuk ka qenë praktikë e mëhershme në procese zgjedhore. Ata e kanë cilësuar trajtimin e rastit si të paprecedentë.
Megjithatë, lista ka ende mundësi ligjore që çështjen ta dërgojë për shqyrtim në Gjykatën Supreme.
Ndërkohë, për zgjedhjet e parakohshme parlamentare të 7 qershorit janë certifikuar edhe disa subjekte të tjera politike serbe, përfshirë Listën Serbe dhe partinë e Nenad Rashiqit “Për Liri, Drejtësi dhe Mbijetesë”.
