Paneli Zgjedhor për Ankesa dhe Parashtresa (PZAP) ka vendosur se disa kandidatë për deputetë nga Lëvizja Vetëvendosje kanë shkelur rregullat zgjedhore duke përdorur institucionet publike për qëllime të fushatës elektorale gjatë zgjedhjeve të 28 dhjetorit.
Për këtë arsye, PZAP i ka shqiptuar LVV-së një gjobë prej 6 mijë eurosh.
Sipas vendimit, PZAP ka vlerësuar si të bazuara ankesat e paraqitura nga Lidhja Demokratike e Kosovës (LDK).
Në vendim thuhet se Arbërie Nagavci, Hysen Durmishi, Arben Vitia, Albulena Haxhiu dhe Hajrulla Çeko kanë shfrytëzuar institucionet publike për promovim elektoral.
“Subjekti politik Lëvizja Vetëvendosje (LVV), me seli në Prishtinë, për shkelje të Kodit të Mirësjelljes për Subjektet Politike, mbështetësit e tyre dhe kandidatët, dënohet me gjobë në vlerë prej 6,000 euro”, thuhet në vendimin e PZAP-it.
Po ashtu, PZAP ka njoftuar se LVV është e obliguar ta paguajë gjobën brenda afatit prej 15 ditësh nga dita kur vendimi bëhet i plotfuqishëm.
