Presidenti rus Vladimir Putin është takuar sot me homologun kinez Xi Jinping në Tianjin të Kinës, në kuadër të samitit të Organizatës së Bashkëpunimit të Shangait (SCO), që zhvillohet më 31 gusht dhe 1 shtator.
Pas këtij samiti, Putin pritet të udhëtojë në Pekin për takime më të zgjeruara me presidentin Xi dhe, sipas burimeve ndërkombëtare, ka gjasa që të zhvillojë edhe një takim me udhëheqësin e Koresë së Veriut, Kim Jong-un, më vonë gjatë javës.
SCO është një grupim rajonal sigurie i themeluar për të kufizuar ndikimin e aleancave perëndimore si NATO.
Ajo përfshin vende si Kina, Rusia, India, Pakistani dhe disa shtete të Azisë Qendrore.
Vizita e Putinit në Kinë vjen në një kohë tensioni të lartë ndërkombëtar, ndërsa Rusia kërkon të thellojë partneritetin strategjik me Kinën dhe të zgjerojë bashkëpunimin me vendet jo-perëndimore në fushat e sigurisë, ekonomisë dhe teknologjisë./rtsh.al/
