Zëdhënësi i Kremlinit, Dmitry Peskov, njoftoi të hënën se Presidenti rus Vladimir Putin është ftuar të bashkohet me “Bordin e Paqes”, një organ ndërkombëtar i krijuar për të adresuar konfliktet, duke filluar me situatën në Gaza.
Ai tha se Rusia po shqyrton propozimin dhe po analizon të gjitha detajet, duke shpresuar për kontakte me palën amerikane për sqarimin e nuancave, raporton Anadolu.
Shtëpia e Bardhë përshkroi Bordin e Paqes si një mjet për zbatimin e planit 20-pikësh të Presidentit Donald Trump për të dhënë fund luftës në Gaza dhe për të mbikëqyrur rindërtimin e enklavës, duke ofruar mbikëqyrje strategjike, mobilizim të burimeve ndërkombëtare dhe llogaridhënie gjatë kalimit nga konflikti në paqe dhe zhvillim.
Po ashtu, SHBA-ja ka ngritur Komitetin Kombëtar për Administrimin e Gazës (NCAG) dhe borde ekzekutive për të mbështetur këtë proces.
Trump ka ftuar gjithashtu liderë të tjerë botërorë, përfshirë presidentin turk Rexhep Tajip Erdogan.
Peskov njoftoi se nuk ka planifikuar asnjë bisedë midis Putinit dhe presidentes së përkohshme të Venezuelës, Delcy Rodriguez, por kontaktet mund të organizohen nëse është e nevojshme.
Ai gjithashtu konfirmoi se Kremlini po monitoron nga afër situatën lidhur me deklaratat e Trump për “kërcënimin” e Rusisë ndaj Grenlandës.
