Në gusht të vitit të kaluar, ishin vendosur shiritat që ndaluan punimet.
Kjo pasi në këtë vend u rrënuan tri monumente historike në kompleksin monumental “Saraji i Vjeter” në Prizren.
Deri te ky vendim erdhi pasi nga Ministria e Kulturës ishte bërë një padi dhe kallëzim penal ndaj kryetarit të Prizrenit, Shaqir Totaj dhe katër zyrtarëve tjerë.
Lidhur me këtë kallëzim penal pati reaguar edhe ministri Hajrullah Çeku, përmes një postimi në Facebook.
“Kodi Penal i Republikës së Kosovës, veprat e klasifikuara si: Dëmtimi, shkatërrimi dhe nxjerrja e paautorizuar e monumenteve ose objekteve të mbrojtura jashtë Republikës së Kosovës, i dënon deri në 10 vjet burgim, ndërsa si masë pasurore, sipas Ligjit për trashëgimi kulturore, dënohen me gjobë nga 1 mijë deri në 500 mijë euro”.
Por, Totaj ka treguar për televizionin se hetimet ndaj tij dhe zyrtarëve komunalë kanë pushuar, pasi nuk ka pasur elemente për ndonjë vepër penale.
“Ministri ka pasë informacione edhe për shkak të qasjes së tij tendencioze duke mos dashur me pranu faktin se zyrtarët e tij kanë gabu, ka tentu me gjujtë fajin tjetër kah, ka bërë kallëzime penale dhe normalisht edhe Prokuroria e Hetuesia e kanë kryer punën e vet edhe hetimet janë ndërprerë kështu që nuk ka aty kurrfarë dileme apo dyshimi që mund të ketë diçka që nuk është respektu ligji apo diçka tjetër”, tha Totaj.
Ai akuzon pushtetin qendror se nuk po i përkrahë projektet e tyre në nivel lokal.
“Në përgjithësi Vetëvendosje njohet si parti e cila shumë lehtë bëjnë kallëzime penale për me kriju një pasqyrë të rrejshme se kinse po luftojmë korrupsionin mirëpo realiteti është ndryshe sepse të gjitha ato kallëzime penale kanë përfundu me mbyllje të hetimeve pa ndonjë rezultat konkret dhe kjo tregon edhe qasjen e tyre e cila nuk është proaktive por është reaktive edhe e tregon paaftësinë e tyre që realisht mu marr me problemet e qytetarëve por vazhdimisht kërkohet faj diku tjetër”.
Tëvë1 ka kërkuar informacione edhe nga Prokuroria Speciale lidhur me këto kallëzime penale, por që nuk ka pasur përgjigje.
