Prokuroria Speciale e Republikës së Kosovës ka pushuar hetimin ndaj ish-sekretarit të Ministrisë së Mjedisit, Izedin Bytyqi, i cili ishte nën hetim për dyshime për keqpërdorim të pozitës apo autoritetit zyrtar në rastin e njohur si “afera e ambalazhuesve të ujit”.
Lajmin e ka bërë të ditur vetë Bytyqi, i cili ka njoftuar se më 8 tetor ka pranuar aktvendimin e Prokurorisë Speciale për pushimin e hetimit, pas një procesi që, sipas tij, ka zgjatur rreth dy vjet.
“Sot kam pranuar aktvendimin e Prokurorisë Speciale të Republikës së Kosovës me të cilin është pushuar hetimi ndaj meje, i zhvilluar për dy vite nën dyshimin për kryerjen e veprës penale ‘Keqpërdorimi i pozitës apo autoritetit zyrtar’, në lidhje me rastin e njohur publikisht si ‘afera e ambalazhuesve të ujit’”, ka shkruar Bytyqi në Facebook.
Sipas tij, gjatë periudhës së hetimit janë ndërmarrë një sërë veprimesh hetimore, përfshirë masa të fshehta hetimore, kontrolle dhe verifikime të pasurisë, pronave, llogarive bankare dhe transaksioneve financiare.
“Pas gjithë kësaj kohe dhe pas shqyrtimit të provave dhe materialeve të mbledhura, Prokuroria ka marrë vendim për pushimin e hetimit, pasi nuk janë gjetur prova apo dëshmi që vërtetojnë se kam kryer veprën penale për të cilën jam hetuar”, ka deklaruar ai.
Bytyqi ka thënë se vendimi është i rëndësishëm për të, duke theksuar se hetimi dyvjeçar ka pasur pasoja personale, familjare, profesionale dhe në reputacionin e tij.
“Ky vendim nuk i fshin dy vitet e vështira që kam kaluar, por është një hap i rëndësishëm drejt rikthimit të plotë të dinjitetit dhe reputacionit tim”, ka shkruar ai.
Bytyqi ishte arrestuar në vitin 2024 së bashku me ushtruesin e detyrës së drejtorit të Autoritetit Rajonal të Pellgjeve Lumore, Naser Hafizi. Rasti kishte të bënte me borxhet e operatorëve ekonomikë që merreshin me ambalazhimin e ujit.
Sipas dyshimeve të ngritura në atë kohë, Bytyqi kishte tejkaluar kompetencat zyrtare dhe kishte vepruar në kundërshtim me Ligjin për Ujërat dhe udhëzimin për strukturën e pagesave ujore.
Në kuadër të rastit ishte përmendur edhe një raport i grupit ministror, sipas të cilit borxhi i operatorëve ekonomikë ndaj Autoritetit Rajonal të Pellgjeve Lumore arrinte në 19,297,447.47 euro.
Bytyqi dyshohej se, pa bazë ligjore dhe pa verifikuar faktet, kishte nxjerrë vendime për zvogëlimin e borxheve të disa operatorëve ekonomikë, me pretendimin se këto veprime mund t’u sillnin përfitim të kundërligjshëm personave të caktuar dhe t’i shkaktonin dëm buxhetit të shtetit.
Megjithatë, sipas njoftimit të Bytyqit, pas përfundimit të veprimeve hetimore Prokuroria Speciale ka vendosur ta pushojë hetimin ndaj tij.
Në vitin 2026, në lidhje me këtë rast ishte intervistuar për disa orë edhe ish-ministri i Mjedisit, Liburn Aliu.
Bytyqi, ndërkohë, gjatë këtij viti kishte dhënë dorëheqje nga pozita e sekretarit të Ministrisë së Infrastrukturës.
Në reagimin e tij, ai ka falënderuar familjarët, miqtë, kolegët dhe të gjithë ata që, siç ka thënë, kanë besuar në të gjatë periudhës së hetimit.
“Dua të falënderoj miqtë, kolegët, familjarët dhe të gjithë ata që gjatë kësaj periudhe kanë besuar në mua dhe kanë pritur me durim përfundimin e procesit”, ka shkruar Bytyqi.
