Punëtorët e Radiotelevizionit të Kosovës edhe sot vazhdojnë grevën dyorëshe për shkak të mosmarrjes së pagave.
Kryetari i Sindikatës së Punëtorëve të RTK-së, SPERTK, Gëzim Bimbashi, ka deklaruar sot se greva e punëtorëve ka hyrë në ditën e tretë, ndërsa ende nuk ka pasur asnjë reagim apo sinjal nga Qeveria e Kosovës për zgjidhjen e situatës.
Bimbashi tha se pavarësisht kërkesave të vazhdueshme dhe adresimeve të shumta, institucionet nuk kanë ndërmarrë hapa konkretë. Ai u shpreh i habitur se si Qeveria arrin të gjejë zgjidhje dhe mjete financiare për çështje të tjera, përfshirë zgjedhjet, por jo për RTK-në, edhe pse transmetuesi publik ka buxhet të ndarë.
Ai theksoi se një nismë nga ministri i Financave, Hekuran Murati, do të mjaftonte për të proceduar mjetet e nevojshme për RTK-në. Sipas tij, situata është rënduar aq shumë sa rreth gjysma e punëtorëve rrezikojnë të mos paraqiten më në punë, pasi nuk po paguhen për punën e tyre.
Bimbashi përsëriti thirrjen drejtuar Qeverisë Kurti që të gjejë zgjidhje sa nuk është bërë vonë. Ai theksoi se punëtorët e RTK-së nuk janë të përfshirë në politikë dhe se greva është vetëm për të kërkuar një të drejtë themelore.
Kryetari i SPERTK-ut paralajmëroi se mungesa e veprimeve institucionale, përfshirë vonesën e miratimit të ligjit të ri për RTK-në, ka çuar transmetuesin publik në krizë serioze. Ai u bëri thirrje edhe partive politike të legjislaturës së ardhshme që të miratojnë ligjin dhe t’i garantohet RTK-së vazhdimësia e punës.
Bimbashi kujtoi se RTK ka buxhetin më të ulët në rajon për një medium publik dhe se vazhdon të funksionojë edhe me 2.2 milionë euro më pak, mjete të cilat janë hequr pesë vjet më parë.
