Pjesëmarrja e kryeministrit Kurti në ceremoninë e nënshkrimit të kontratave të 220 punëtorëve të rinj në KEK, po quhet si pjesë e parafushatës elektorale. Një gjë e tillë, vlerësohet se bie ndesh me qëndrimet e mëhershme të Lëvizjes Vetëvendosje.
Është boshti kryesor i rrjetit energjetik në vend.
Korporatës Energjetike të Kosovës, të hënën e parë të vitit 2025, iu shtuan formalisht 220 punëtorë të rinj.
Nënshkrimi i kontratave të tyre u bë në mënyrë ceremoniale, me në krye kryeministrin Kurti e anëtarë tjerë qeveritarë.
Veprimet e tilla po kritikohen, e po quhen si punësime në kohë fushatë parazgjedhore.
“Ideja është më përçu mesazhin tek qytetari që nuk mundesh me u punësu pa kalu kah dyert e partisë në pushtet. Është pikërisht kjo ideja ndaj të cilës Vetëvendosja si opozitë ka protestuar shumë edhe është angazhuar shumë, mirëpo sot e udhëheq, le të themi në mënyrën më kriminale, më të ashpër, më brutale, se asnjë qeveri e mëparshme. Sepse këta e kontrollojnë krejt pushtetin, i kanë krejt votat, edhe tash dojnë me i kontrollu edhe punësimet”, ka thwnw Nol Nushi nga PSD.
Veprime të tilla nga ana e ekzekutivit, nuk vlerësohen si korrekte me ligjin.
“Janë një vazhdimësi e blerjeve elektorale, është një aktivitet parazgjedhor ligjërisht i papranueshëm. E gjithë kjo, tregon se Qeveria Kurti nuk ka qenë e interesuar në zgjidhjen e problemeve të qytetarëve, ngase kemi rritje të çmimeve, kemi një inflacion, nuk kemi një barazim në përputhje me inflacion. Mirëpo, mënyra e vetme për t’i blerë elektoratin është mbajtja e kësaj fushate parazgjedhor, e cila juridikisht nuk është e mbështetshme”, ka thwnw avokati, Kadri Osaj.
Këta 220 punëtorët e rinj, janë pjesë e Termocentralit Kosova B, në Divizionin e Qymyrit.
