Prokurorja, Laura Pula ka bërë të ditur se një person në Komunën e Fushë-Kosovës është ndaluar dhe intervistuar lidhur me fotografimin e votës, por më pas është liruar në procedurë të rregullt.
Në një lidhje direkte për Televizionin Tëvë1, Pula ka thënë se pas intervistimit është vërtetuar se i dyshuari nuk ka pasur ndonjë qëllim të caktuar apo kërcënim nga dikush.
“Është raportuar një rast i fotografimit të votës në Komunën e Fushë-Kosovës. Personi që e ka bërë është ndaluar dhe intervistuar dhe, meqenëse nuk ka pasur ndonjë qëllim të caktuar dhe nuk ka qenë i kërcënuar nga askush, ai është liruar në procedurë të rregullt”, ka thënë Pula.
Ajo ka shtuar se çdo incident që raportohet apo evidentohet do të trajtohet me prioritet dhe vëmendje të veçantë.
Sipas saj, procesi i votimit po shkon shumë mirë dhe nuk ka arsye për shqetësim.
“Procesi po ecën shumë mirë dhe nuk ka asgjë për t’u shqetësuar apo që mund ta cënoj atë. Ka pasur disa incidente të vogla, të cilat janë raportuar dhe po trajtohen me prioritet dhe vëmendje të veçantë. Nuk ka raste që duhet të evidentohen si vepra penale; jo çdo incident i raportuar përmban elemente të veprës penale. Deri në verifikimin e kundërt, ato mbeten vetëm informacione”, ka theksuar Pula.
Sa i përket votimit në grup të qytetarëve serbë në veri të vendit, Pula ka njoftuar se rasti është duke u hetuar dhe gjatë ditës do të merret vendim mbi veprimet e nevojshme.
Ajo ka theksuar se autoritetet përkatëse, përfshirë KQZ-në dhe menaxherët e qendrave të votimit, janë të obliguar të raportojnë çdo parregullsi në Policinë e Kosovës dhe Prokurorinë e Shtetit.
“Rasti i votimit në grup në Mitrovicë po trajtohet. Gjatë ditës do të shihet se si ka shkuar procesi i votimit. Nëse personat kanë hyrë së bashku, kjo do të verifikohet gjatë procedurave të hyrjes në qendrat e votimit dhe të mënyrës së votimit. Personat brenda KQZ-së dhe menaxherët e qendrave janë përgjegjës për kontrollin e procesit dhe janë të detyruar të raportojnë çdo parregullsi në Policinë e Kosovës dhe Prokurorinë e Shtetit”, ka nënvizuar ajo./teve1.info/
