Kështu deklaroi Vuçiqi pas patrullimit të Policisë së Kosovës në kufi dhe në gjithë hapësirën e liqenit të Ujmanit.
Për këtë, Pula në emisionin “Info Nata” në Tëvë1, tha se deklarimet e tilla të Vuçiqit nuk i shërbejnë normalizimit të marrëdhënieve ndërfqinjësore.
“Kjo nuk i shërben fqinjësisë. Nuk duhet harruar që territori i Kosovës është i njohur në tërësinë e saj dhe jo pjesë-pjesë. Deklarimet e tilla nuk i shërbejnë normalizimit të marrëdhënieve ndërshtetërore dhe ndërfqinjësore”, deklaroi ai.
Sipas tij, deklarimet e tilla zbehin vullnetin politik për të shkuar përpara për arritjen e marrëveshjeve mes Kosovës dhe Serbisë.
“Fakti që po tentohet nga ana e Qeverisë së Kosovës të shtrihet autoriteti shtetëror dhe territorial në veriun e vendit, nga fqinji ynë po shihet si një pushtim në mënyrë të heshtur. Kjo tregon shumë se çfarë qasje kanë karshi nesh. Këto deklarime e zbehin vullnetin politik për të shkuar përpara për arritjen e marrëveshjeve të cilat janë në pritje”, theksoi Pula. /teve1.info/
